Ծրագիրը մասնագետներին ներգրավում է կես դրույքով, ինչը թույլ է տալիս համատեղել կրթությունը և աշխատանքը։
Հայաստանի տեղեկատվական համակարգերի գործակալության «Երիտասարդ մասնագետների ներգրավման ծրագրի» նպատակն է ձևավորել Հայաստանի թվային վերափոխման առաջնորդների հաջորդ սերունդը։ Ծրագիրը նախատեսված է ավարտական կուրսերում սովորող ուսանողների և նորավարտ երիտասարդ մասնագետների համար և նրանց առաջարկում է գործնական գիտելիքներ և փորձ թվային կառավարման, կիբեռանվտանգության և տեղեկատվական համակարգերի ոլորտներում։
Ծրագրի մասին
«Երիտասարդ մասնագետների ներգրավման ծրագրի» տևողությունը 1 տարի է: Միանալով ծրագրին՝ մասնակիցները հնարավորություն ունեն ընտրելու Գործակալության 6 բաժիններից 3-ը՝ փորձառությունն անցնելով հենց այդ թիմերում:
Աշխատելով Գործակալության 3 տարբեր թիմերում՝ մասնակիցները ձեռք են բերում ամբողջական պատկերացում, փորձ և գիտելիք թվային վերափոխման ու թվայնացման մասին: Լավագույնները ծրագրի ավարտից հետո կունենան հնարավորություն շարունակելու իրենց ճանապարհը Գործակալությունում՝ ստանալով աշխատանքի առաջարկ:
ՀՏՀԳ-ի 6 թիմերն են՝
- Կիբեռանվտանգություն
- UI\UX և թվային ծառայությունների մատուցում
- Տվյալների կառավարում և փոխգործելիություն
- Քաղաքացիների Լաբ
- Հասարակայնության հետ կապեր
- Գործառնություններ
Ինչու՞ միանալ
Հայաստանի տեղեկատվական համակարգերի «Երիտասարդ մասնագետների ներգրավման ծրագիրը» տալիս է հնարավորություն՝
Նպաստելու երկրի թվային կարողությունների զարգացմանը. երիտասարդ մասնագետները կդառնան Հայաստանի թվային հասարակության ձևավորման մի մասը՝ բերելով փոփոխություններ թվային կառավարման և կիբեռանվտանգության ոլորտներում։
Բարելավելու մասնագիտական հմտությունները. ծրագրի մասնակիցները ձեռք կբերեն գործնական փորձ թվային կառավարման, ծրագրերի կառավարման և առաջատար տեխնոլոգիաների աշխարհում։
Դառնալու գաղափարակից համայնքի մի մասը. աշխատելով հանրային և մասնավոր ոլորտի առաջնորդների և գործընկերների հետ՝ երիտասարդ մասնագետները մասը կդառնան Հայաստանի թվային վերափոխման տեսլականով ոգևորված մեծ համայնքի։
Զարգացնելու առաջնորդական հմտությունները. գործնական աշխատանքի և մենթորության միջոցով ծրագրի մասնակիցները կդառնան հաջորդ սերնդի թվային առաջնորդը։
Համապատասխանություն
Ծրագրին կարող են դիմել բակալավրիատի կամ մագիստրատուրայի ավարտական կուրսերում սովորող բոլոր այն ուսանողները և նորավարտ երիտասարդ մասնագետները, ովքեր ունեն տեղեկատվական տեխնոլոգիաների, թվային կառավարման, կիբեռանվտանգության, քաղաքականությունների վերլուծության, ծրագրերի կառավարման կամ հարակից ոլորտների կրթություն կամ փորձառություն:
Դիմելու գործընթաց
- Ծրագրին դիմելու համար անհրաժեշտ է լրացնել մասնակցության հայտադիմումը։
- Ընտրված թեկնածուները կհրավիրվեն հարցազրույցի, ապա՝ հմտությունների գնահատման խմբային աշխատանքի։
Վերջնաժամկետ
Հայտադիմումների ընդունման վերջնաժամկետը հունվարի 31-ն է, իսկ ծրագիրը մեկնարկելու է 2025 թվականի մայիսին:
Մեր արժեքները
«Երիտասարդ մասնագետների ներգրավման ծրագիրը» հիմնված է երեք հիմնական արժեքների վրա՝
- Բարեվարքություն
- Համագործակցություն
- Նպատակասլացություն