ՀՀ Ազգային Ժողովի Ութերորդ գումարման տասնմեկերորդ նստաշրջանի 2026 թվականի մարտի 26-ին գումարված հերթական նիստի ընթացքում Տեղեկատվական համակարգերի կարգավորման հանձնաժողովի նախագահ ընտրվեց Ներսես Երիցյանը։ Տեղեկատվական համակարգերի կարգավորման հանձնաժողովն ինքնավար կարգավորող մարմին է, որն ապահովում է տեղեկատվական համակարգերի անվտանգության միջոցառումների մշակման աշխատանքները և համակարգում տեղեկատվական համակարգերի անվտանգության միջոցառումների իրականացումը, մշակում է տեղեկատվական համակարգերի թվային ճարտարապետությունը: Հանձնաժողովի հիմնական խնդիրը Հայաստանի Հանրապետության միասնական, կիբեռանվտանգ թվային միջավայրի ձևավորման և զարգացման համար կարգավորող իրավական դաշտի ապահովումն է, որը հնարավորություն կտա պետական տեղեկատվական համակարգի միջոցով քաղաքացիներին մատուցել թվային հարմարավետ ծառայություններ։ Ելույթ ունենալով՝ Ներսես Երիցյանը շնորհակալություն է հայտնել Կառավարությանը վստահության և իր թեկնածությունն այդ կարևոր պաշտոնում առաջադրելու համար, ներկայացրել այդ պաշտոնում ընտրվելու պարագայում իր գործունեության տեսլականն ու պատկերացումները, խոսել թվային վերափոխման, մրցունակ թվային հասարակություն եւ տնտեսություն ձևավորելու գործընթացից, անդրադարձել կիբեռանվտանգության ապահովման հարցին, ոլորտում առկա մարտահրավերներին և այլ հարցերի: «Ձեր վստահությանն արժանանալուց հետո պատրաստ եմ իմ հանրային և կորպորատիվ կառավարման գիտելիքները, փորձը և լավագույն միջազգային փորձառությունը ներդնել, որպեսզի հանձնաժողովի անդամների հետ համատեղ ձևավորենք օրինակելի և մրցունակ  հանրային կառույց»,- ընդգծել է նա:

Ազգային ժողովի լիագումար նիստում ՀՀ բարձր տեխնոլոգիական արդյունաբերության նախարար Մխիթար Հայրապետյանը ներկայացրել է «Տեղեկատվական համակարգերի կարգավորման հանձնաժողովի» նախագահի թեկնածուին։ Օրենսդրությամբ սահմանված քվոտայի համաձայն՝ ՀՀ կառավարության կողմից այդ պաշտոնում առաջադրվել է Ներսես Երիցյանի թեկնածությունը՝ 5 տարի ժամկետով։ Մանրամասները` https://hightech.gov.am/.../tegekatv.../ayl/norutyunner/isrc

Վերջին օրերին նկատվում է հեռախոսային խարդախությունների ակտիվացում։ Խաբեբաները զանգահարում են տեղական կամ արտասահմանյան հեռախոսահամարներից կամ ուղարկում են WhatsApp, Telegram և Viber հավելվածներով հաղորդագրություններ: Ներկայանալով որպես բանկի, տելեկոմ օպերատորի, առաքման ծառայության կամ պետական մարմնի աշխատակից, նրանք նպատակ ունեն հասանելիություն ստանալ Ձեր անձնական տվյալներին և հեռախոսի հավելվածներին, որպեսզի Ձեր կամքից անկախ կորզեն ֆինանսական միջոցներ: Օրինակ, նրանք ուղղորդում են՝ ❗փոխանցել կամ թելադրել SMS-ով ստացված ծառայության ակտիվացման կոդը, ❗սեղմել SMS-ով ստացված հղումը և լրացնել բանկային քարտի կամ անձնական տվյալները, ❗տեղադրել հեռախոսում հատուկ ծրագիր, օրինակ՝ 5G ծառայություն ակտիվացնելու համար կամ այլ ծառայությունից անվճար օգտվելու նկատակով: Եթե հետևեք այդ հրահանգներին, խաբեբաները կարող են՝ ▪️հափշտակել Ձեր ֆինանսական միջոցները, ▪️մուտք գործել Ձեր բանկային հավելվածներ և կատարել ցանկացած գործողություններ, ▪️հաղորդագրություններ ուղարկել Ձեր մտերիմներին, ▪️հափշտակել Ձեր հաղորդագրությունները, ▪️Ձեր փոխարեն կառավարել Ձեր հեռախոսը։ ⛔Այս ամենը կարող է տեղի ունենալ ակնթարթային։ Ի՞նչ անել․ 🔷մի՛ պատասխանեք անծանոթ համարներից եկող զանգերին, հատկապես եթե զանգը արտերկրից է,🔷մի՛ սեղմեք անծանոթ SMS հաղորդագրությունների հղումների վրա, 🔷անմիջապես անջատե՛ք զանգը եթե Ձեզ խնդրում են տվյալներ տրամադրել, հղում բացել կամ որևէ գործողություն կատարել, 🔷մի՛ փոխանցեք Ձեր անձնական տվյալները, գաղտնաբառերը կամ բանկային կոդերը հեռախոսի միջոցով: 🛡️Հայաստանի տեղեկատվական համակարգերի գործակալություն🛡️Հայաստանի համակարգչային միջադեպերի արձագանքման թիմ (AM-CERT)

Բարձր տեխնոլոգիական արդյունաբերության նախարարությունը և «Հայաստանի տեղեկատվական համակարգերի գործակալություն» հիմնադրամը  (այսուհետ՝ Գործակալություն), նպատակ ունենալով խթանել Հայաստանի Հանրապետության թվային վերափոխումը՝ թվային լուծումների ներդրմամբ և լայնատարած օգտագործման ապահովմամբ, պետական ծառայությունների հասանելիությունն ու որակը բարձրացնելու նպատակով իրականացնում են  նախամրցութային շուկայի ուսումնասիրություն (market sounding)՝ արհեստական բանականության հիմքով աշխատող զանգերի և չաթերի կենտրոնի հնարավոր լուծումների, տեխնիկական մոտեցումների և շուկայի ընդհանուր կարողությունների գնահատման նպատակով։ Նշված փուլում որևէ գնման ընթացակարգ մեկնարկած չէ։ Կից ներկայացնում ենք նշված լուծումների համար մշակված տեխնիկական առաջադրանքի նախագիծը՝ քննարկման և մասնագիտական կարծիքների հավաքագրման նպատակով։ Այս նպատակով, հրավիրում ենք ներկայացնելու Ձեր առաջարկներն ու դիտարկումները՝ մասնավորապես հետևյալ ուղղություններով․ հնարավոր տեխնիկական լուծումներ և մոտեցումներ, նմանատիպ համակարգերի ներդրման փորձ (եթե առկա է), տեխնիկական իրագործելիության հետ կապված նկատառումներ, հնարավոր ռիսկեր, սահմանափակումներ և զարգացման հնարավորություններ, որոնք կսահմանափակեն Ձեր մասնակցությունը մրցույթին, այլ առաջարկներ։ Խնդրում ենք նկատի ունենալ, որ սույն նամակը չի հանդիսանում մրցույթի հայտարարություն, առաջարկ ներկայացնելու հրավեր կամ որևէ իրավական կամ ֆինանսական պարտավորություն ստեղծող փաստաթուղթ։ Տրամադրվող տեղեկատվությունը կօգտագործվի բացառապես ներքին վերլուծության, պահանջների հստակեցման և ծրագրի նախապատրաստման նպատակներով և չի կարող ազդել ապագայում հնարավոր մրցութային գործընթացներին մասնակցելու իրավունքների վրա։ Քննարկումը կկայանա հունվարի 30-ին, ժամը 17:00-ից մինչև 19:00-ը (GMT+4)։ Այն կանցկացվի խառը ձևաչափով․ մասնակիցները կարող են մասնակցել ինչպես առկա Բարձր տեխնոլոգիական արդյունաբերության նախարարության գլխամասում (Երևան 0010, Վազգեն Սարգսյան 3/3), այնպես էլ առցանց ձևաչափով։ Քննարկմանը գրանցվելու և առցանց մուտքի հղումը ստանալու համար խնդրում ենք անցնել հետևյալ հղումով։ Խնդրում ենք նկատի ունենալ, որ ծառայություն մատուցող կազմակերպության յուրաքանչյուր ներկայացուցիչ պարտավոր է գրանցվել առանձին՝ քննարկմանը մասնակցելու համար: Եվ անձամբ, և առցանց մասնակցության դեպքում անհրաժեշտ է ներկայացնել անձը հաստատող փաստաթուղթ։ Հարցերի դեպքում կարող եք զանգահարել հետևյալ հեռախոսահամարով՝ 044 490626: Կանխավ շնորհակալություն ենք հայտնում Ձեր ժամանակի և համագործակցության համար։

ՀՀ կառավարության օգոստոսի 14-ի նիստում հաստատվել է բարձր տեխնոլոգիական արդյունաբերության նախարարության կողմից ներկայացված «Կիբեռանվտանգության մասին», «Հանրային տեղեկությունների մասին»,  «Տեղեկատվական համակարգերի կարգավորման մարմնի  մասին» օրենքների նախագծերի փաթեթը, որը մշակվել է Հայաստանի տեղեկատվական համակարգերի գործակալության հետ համատեղ: Ներկայացնելով նախագծերի փաթեթը՝ ԲՏԱ նախարար Մխիթար Հայրապետյանն ընդգծել է, որ այն նպատակ ունի ստեղծել միասնական և համակարգված մոտեցում կիբեռմիջադեպերի կանխարգելման, արձագանքման և հետևանքների վերացման համար՝ հիմնվելով պետություն-մասնավոր հատվածի սերտ համագործակցության վրա: Փաթեթով կարգավորվում են նաև միասնական թվայնացված միջավայրի ստեղծման և բաց տվյալների քաղաքականության ներդրմանն առնչվող հարցերը:  Նշվել է, որ փաթեթը անցել է երկարատև և բարդ քննարկումների փուլ, որոնցում ներգրավված են եղել քաղաքացիական հասարակության ներկայացուցիչներ, ոլորտային միություններ, անկախ փորձագետներ, միջազգային գործընկերներ և շահագրգիռ պետական գերատեսչություններ։ Նախարար Հայրապետյանը, անդրադառնալով նախագծերի փաթեթում ներկայացված օրենքներին, մանրամասնել է յուրաքանչյուրի կարգավորման առարկան, նպատակն ու կարևորությունը։«Կիբեռանվտանգության մասին» օրենքով սահմանվում են կենսական նշանակություն ունեցող ոլորտներն ու կրիտիկական ենթակառուցվածքները՝ ինչպես պետական, այնպես էլ մասնավոր հատվածում։ Սահմանվում են չափանիշներ՝ հիմնված ռիսկերի և ազդեցության գնահատման վրա, ինչպես նաև որոշակի ստանդարտներ, որոնք պարտադիր են պետական կառույցների, հանրային ոլորտի և քաղաքացիական ենթակառուցվածքներ շահագործող մասնավոր ընկերությունների համար»,- նշել է նախարարն՝ ընդգծելով, որ դա չի նշանակում հրաժարվել ազգային ստանդարտների մշակման և ներդրման գաղափարից։ Իր ելույթում նախարարը ներկայացրել է, որ ստեղծվելու է Տեղեկատվական համակարգերի կարգավորման մարմին, որը գործելու է ինքնավար մարմնի կարգավիճակով, իսկ անդամներն ընտրվելու են ՀՀ ազգային ժողովի կողմից։ Անդրադառնալով «Հանրային տեղեկությունների մասին» օրենքին՝ նախարարը նշել է, որ դրանով ուրվագծվում է պետական թվային ճարտարապետությունը և ներդրվում է տվյալների կառավարման նոր քաղաքականություն: Նախագծերի վերաբերյալ լրացուցիչ պարզաբանումներ է ներկայացրել նաև Հայաստանի տեղեկատվական համակարգերի գործակալության տնօրեն Ներսես Երիցյանը։ Ամփոփելով իր ելույթը՝  Մխիթար Հայրապետյանը կարևորել է հասարակության կիբեռգրագիտության բարձրացմանն ուղղված ծրագրերի իրականացումը։  Ավելին՝ տեսանյութում 

Հայաստանի տեղեկատվական համակարգերի գործակալությունը մեկնարկում է առաջին Ուսանողական ազգային կիբեռվարժանքը։ Այս հոկտեմբերին Հայաստանի տարբեր համալսարանների ուսանողներ կմասնակցեն ազգային մասշտաբով կիբեռանվտանգության սիմուլյացիոն վարժանքի, որտեղ կլուծեն իրական կիբեռ միջադեպեր։ Նախաձեռնությունը նպատակ ունի բարձրացնել կիբեռանվտանգության իրազեկվածությունն ու հմտությունները ուսանողների շրջանում։ Վարժանքը հանդիսանում է ՀՏՀԳ երկարաժամկետ ռազմավարության մի մասը՝ ուղղված թվային անվտանգ ապագայի կառուցմանը և կիբեռ առաջնորդների նոր սերնդի ձևավորմանը։ Մասնակիցները ներգրավված են իրական աշխարհում տեղի ունեցող կիբեռպատահարների մոդելավորմամբ՝ ինտերակտիվ, դերային ուսուցման մեթոդներով, համահունչ Հայաստանի թվայնացման և ազգային կիբեռանվտանգության օրակարգին։

2024թ․ մայիսին Երիտասարդ մասնագետների ներգրավման ծրագրի շրջանակում Գործակալությանը միացան 20 երիտասարդ մասնագետներ։ Մեկ տարվա ընթացքում երիտասարդ մասնագետներն ակտիվորեն ներգրավվեցին Գործակալության նորարարական նախաձեռնություններում՝ կիբեռանվտանգությունից մինչև Քաղաքացիների լաբորատորիա, տվյալների կառավարումից մինչև թվային ծառայությունների ստեղծում։ Ներսես Երիցյանն ամփոփիչ միջոցառմանը նշեց,  որ ծրագրի շնորհիվ երիտասարդ մասնագետները ոչ միայն ձևավորեցին կարևոր մասնագիտական փորձառություն, այլև հանդես եկան վերլուծություններով, նորարարական այլընտրանքային առաջարկներով ու լուծումներով՝ նպաստելով թվային փոխակերպման գործընթացին։ Նրանցից յուրաքանչյուրը դարձավ փոփոխությունների շարժիչ ուժ՝ ապացուցելով, որ հենց երիտասարդներն են Հայաստանի թվային հասարակության ապագան կերտողը։ Երիտասարդ մասնագետներից մի քանիսը կշարունակեն իրենց աշխատանքային ուղին հենց Գործակալությունում՝ շարունակելով ներդնել իրենց նորարար գաղափարներն ու էներգիան թվային Հայաստանի կերտման ճանապարհին։ Գործակալությունն իր երախտագիտությունն է հայտնում բոլոր մասնակիցներին՝ ստեղծարարության և թիմային աշխատանքի համար՝ մաղթելով նրանց հաջողություններ հետագա գործունեության մեջ։ 

Հայաստանի Հանրապետության քաղաքացիները 2025 թվականին կազատվեն էլեկտրոնային ստորագրության ակտիվացման տարեկան 3000 ՀՀ դրամ վճարից՝ սկսած սույն թվականի փետրվարի 1-ից:Այս նախաձեռնության նպատակն է հեշտացնել և խթանել քաղաքացիների համար էլեկտրոնային ստորագրության ձեռքբերումը և օգտագործումը՝ պետական և մասնավոր թվային ծառայություններից օգտվելիս, այդ թվում՝ ֆիզիկական անձանց տարեկան եկամուտները հայտարարագրելիս։