Հուլիսի 23-25-ին Բարձր տեխնոլոգիական արդյունաբերության նախարարությունը, Կենտրոնական բանկը և Տեղեկատվական համակարգերի գործակալությունը “Google Mandiant” ընկերության հետ համատեղ կազմակերպել են «Միջադեպերի արձագանքման պատրաստականություն» թեմայով աշխատաժողով։

Աշխատաժողովի նպատակն է ներկայացնել և քննարկել Հայաստանում գործող պետական կառավարման մարմինների և մասնավոր հատվածի շահառու կազմակերպությունների կիբեռ խոցելիության մարտահրավերները, կիբեռ միջադեպերի արձագանքման ունակությունների բարձրացումը, ազգային կարողությունների զարգացումը, ինչպես նաև` միջազգային առաջատար փորձի տեղայնացման շրջանակը։

Բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանն իր ողջույնի խոսքում կարևորել է պետության և մասնավորի համագործակցության համատեքստում ջանքերի մեկտեղումը՝ կիբեռ անվտանգության ոլորտում առկա մարտահրավերներին դիմակայելու նպատակով։ Հաջորդիվ, ԿԲ նախագահի տեղակալ Արմեն Նուրբեկյանն ընդգծել է, որ ազգային կրիտիկական ենթակառուցվածքների, այդ թվում՝ ֆինանսական համակարգի անխափանության, շարունակականության ապահովման և կիբեռ խոցելիություններից պաշտպանվածության բարձրացումն ունեն կենսական նշանակություն։

Նման միջոցառումները կրելու են շարունակական բնույթ՝ ազգային կարողությունների զարգացման, ենթակառուցվածքների և տեղեկատվական համակարգերի կիբեռ պաշտպանության բարձրացման նպատակով։