Հայաստանի տեղեկատվական համակարգերի գործակալությունը (ՀՏՀԳ) հրավիրում է ՀՀ-ում գործող կրթական ծառայություններ տրամադրող կազմակերպություններին  ներկայացնելու հայտեր՝ ԱՄՆ Կարնեգի Մելոն համալսարանի աջակցությամբ Կիբեռանվտանգության կառավարման, ռիսկերի և համապատասխանության (CGRC) ուղղությամբ Ռիսկերի կառավարման մասնագետի կրթական ծրագրի (Ծրագիր) մշակման և իրականացման համար։ 

2025թ․ հունվարի 4-ին ուժի մեջ է մտել “Կիբեռանվտանգության մասին” օրենքը (այսուհետ՝ Օրենք) (ՀՀ «Կիբեռանվտանգության մասին» օրենք, ՀՕ-442-Ն (ընդունված՝ 04.12.2025, ուժի մեջ՝ 04.01.2026)), որի նպատակը Հայաստանի Հանրապետությունում կենսական նշանակության ոլորտների տեղեկատվական համակարգերում և կրիտիկական տեղեկատվական ենթակառուցվածքներում կիբեռանվտանգ միջավայրի ապահովումն է։   

Հայաստանի Հանրապետությունում թվային հասարակության ձևավորման և զարգացման, ինչպես նաև օրենքի դրույթների լիարժեք իրագործման համար, կրիտիկական տեղեկատվական ենթակառուցվածքներում և այլ բարձր ռիսկայնությամբ կազմակերպություններում առկա է մասնագիտական ներուժի համալրման անհրաժեշտություն:  

Համաշխարհային տնտեսական ֆորումի «Global Cybersecurity Outlook 2025» զեկույցի համաձայն (World Economic Forum, Global Cybersecurity Outlook 2025)` 

• կիբեռանվտանգության համաշխարհային աշխատուժի պակասը գնահատվում է 2.8–4.8 մլն մասնագետ, 
• կազմակերպությունների միայն 14%-ն է վստահ, որ ունի իր կիբեռանվտանգության նպատակներին հասնելու համար անհրաժեշտ մասնագետներն ու հմտությունները, 
• Մասնագետների պակասն անհամաչափ է և կենտրոնացած է անվտանգության գործառնությունների և ամպային անվտանգության ոլորտներում, որոնք առանցքային են կենսական նշանակության համակարգերի անվտանգության պահպանման համար 
• Իսկ հմտությունների բացը 2024–2025 թթ. աճել է 8%-ով, և պետական հատվածում խնդիրը հատկապես ընդգծված է։ 

Ծրագրի նպատակն է՝ Հայաստանում ձևավորել միջազգային չափանիշներին համապատասխան ռիսկերի կառավարման մասնագիտական ներուժ, ամրապնդել տեղական կրթական հաստատությունների կարողությունները և զարգացնել երկարաժամկետ գործընկերություն ճանաչված միջազգային ակադեմիական կառույցների հետ։ 

Նախատեսվում է ընտրել առավելագույնը երկու կազմակերպություն՝ Կարնեգի Մելոն համալսարանի աջակցությամբ կրթական ծրագիրը մշակելու, փորձարկելու, իրականացնելու և հետագայում ինստիտուցիոնալացնելու համար։ 

Ծրագրին հայտ ներկայացնել կարող են անհրաժեշտ մասնագիտական ներուժ ունեցող՝ 

• ՀՀ կառավարության կողմից կամ վերջինիս մասնակցությամբ հիմնադրված պետական (հանրային) բարձրագույն ուսումնական հաստատությունները, 
• Հայաստանի Հանրապետությունում գործող  միջպետական պայմանագրի հիմքով հիմնադրված բարձրագույն ուսումնական հաստատությունները, 
• Հայաստանի Հանրապետության կողմից ճանաչված հավատարմագրում ունեցող մասնավոր բարձրագույն ուսումնական հաստատությունները,  
• Հայաստանի Հանրապետությունում կրթական ծառայություններ տրամադրող մասնագիտական կազմակերպությունները։ 

• ԱՄՆ, Կարնեգի Մելոն․ աջակցություն կրթական ծրագրի մասնակիցների ուսումնական պերսոնաների և մուտքի նախապայմանների սահմանմանը, կրթական ծրագրի բովանդակության, գնահատման չափանիշների և մոտեցումների մշակմանը, ինչպես նաև դասընթացավարների վերապատրաստմանը (TOT)։ 
• Մասնակից կազմակերպություն․ կրթական ծրագրի մշակում և դասավանդում ( կրթական ծրագրի մշակում՝ ընդհանուր առնվազն 160 ժամ 3-4 մասնագետների ներգրավմամբ, կրթական ծրագրի իրագործում՝ ընդհանուր 35-45 ժամ նախնական ծանրաբեռնվածություն), կրթական ծրագրում մասնակիցների ներգրավում, փորձի փոխանցում։ 
• ՀՏՀԳ․ համագործակցության համակարգում և աջակցություն մասնակից հաստատությանը աշխատանքների կազմակերպման ուղղությամբ։ 

Հայտատուն պետք է ներկայացնի հետևյալ տեղեկատվությունը․ 

• կազմակերպության գործունեության լիցենզիան և, կիրառելիության ու առկայության դեպքում, հավատարմագրման վկայականը, 
• ծրագրում ներգրավվող վարչական, տեխնիկական և մասնագիտական անձնակազմի տվյալները (ըստ պահանջների), 
• կրթական ծրագիրը մշակող և իրականացնող մասնագետների ինքնակենսագրությունները՝ ներառելով կրթությունը, մասնագիտական փորձը, ներկայիս զբաղվածությունը և առկա հավաստագրերը, 
• ծրագրի իրականացման համար հասանելի տեխնիկական և ֆիզիկական ռեսուրսների նկարագրությունը, 
• ծրագրի մշակման, իրականացման, հետփորձարարական բարելավման և հետագա կայունացման/ինստիտուցիոնալացման մոտեցումը։ 

Ծրագրին մասնակից դասընթացավարների/ծրագիր մշակողների նվազագույն պահանջներ. 

Հայտատու կազմակերպությունը ներկայացնում է 3-4 անդամից բաղկացած բազմամասնագիտական թիմ՝ ծրագրի մշակման և դասավանդման համար, յուրաքանչյուրի համար նշելով ծրագրում նախատեսվող դեր(եր)ը, պատասխանատու թեմաները և ներգրավվածության ձևը։ 

Գնահատման գործընթաց 

Հայտերը կգնահատի հանձնաժողովը՝ կազմված ՀՏՀԳ-ի կիբեռանվտանգության և կարողությունների զարգացման թիմերի, ինչպես նաև Կարնեգի Մելոն համալսարանի ներկայացուցիչներից։ 

Գնահատման կարգը 

Գնահատման հանձնաժողովի յուրաքանչյուր անդամ գնահատման յուրաքանչյուր չափանիշի համար գնահատելու է  0–100 միավոր սանդղակով՝  հետևյալ կերպ․ 

• 90–100՝ գերազանց․ ներկայացված տեղեկատվությունը գերազանցում է պահանջները, առկա են հստակ հիմնավորումներ, իսկ ռիսկերը նվազագույն են
• 70–89՝ լավ․ պահանջները բավարարված են, առկա են որոշակի ոչ էական բացթողումներ
• 50–69՝ բավարար․ պահանջները բավարարված են մասամբ, և առաջարկը էականորեն շեղվում է մրցույթի պահանջներից
• 0–49՝ անբավարար․ առաջարկում ներառված տեղեկատվությունը չի համապատասխանում նվազագույն պահանջներին կամ որոշում կայացնելու համար տեղեկատվությունը հիմնականում բացակայում է։ 

Յուրաքանչյուր չափանիշի համար տրված միավորը բազմապատկվում է տվյալ չափանիշի տոկոսային կշռով՝ արտահայտված տասնորդական թվով։ 

Հայտի ամփոփ գնահատականը հաշվարկվում է բոլոր գնահատողների կողմից տրված միավորների միջինացված հաշվարկով։ 

Նվազագույն անցողիկ շեմը 70 միավորն է։ Ընտրված կազմակերպություն(ներ) է ճանաչվում անցողիկ շեմը հաղթահարած և առավելագույն ամփոփ գնահատականը ստացած հայտատուն կամ հայտատուները։