Բարձր տեխնոլոգիական արդյունաբերության նախարարությունը և «Հայաստանի տեղեկատվական համակարգերի գործակալություն» հիմնադրամը  (այսուհետ՝ Գործակալություն), նպատակ ունենալով խթանել Հայաստանի Հանրապետության թվային վերափոխումը՝ թվային լուծումների ներդրմամբ և լայնատարած օգտագործման ապահովմամբ, պետական ծառայությունների հասանելիությունն ու որակը բարձրացնելու նպատակով իրականացնում են  նախամրցութային շուկայի ուսումնասիրություն (market sounding)՝ արհեստական բանականության հիմքով աշխատող զանգերի և չաթերի կենտրոնի հնարավոր լուծումների, տեխնիկական մոտեցումների և շուկայի ընդհանուր կարողությունների գնահատման նպատակով։ Նշված փուլում որևէ գնման ընթացակարգ մեկնարկած չէ։ Կից ներկայացնում ենք նշված լուծումների համար մշակված տեխնիկական առաջադրանքի նախագիծը՝ քննարկման և մասնագիտական կարծիքների հավաքագրման նպատակով։ Այս նպատակով, հրավիրում ենք ներկայացնելու Ձեր առաջարկներն ու դիտարկումները՝ մասնավորապես հետևյալ ուղղություններով․ հնարավոր տեխնիկական լուծումներ և մոտեցումներ, նմանատիպ համակարգերի ներդրման փորձ (եթե առկա է), տեխնիկական իրագործելիության հետ կապված նկատառումներ, հնարավոր ռիսկեր, սահմանափակումներ և զարգացման հնարավորություններ, որոնք կսահմանափակեն Ձեր մասնակցությունը մրցույթին, այլ առաջարկներ։ Խնդրում ենք նկատի ունենալ, որ սույն նամակը չի հանդիսանում մրցույթի հայտարարություն, առաջարկ ներկայացնելու հրավեր կամ որևէ իրավական կամ ֆինանսական պարտավորություն ստեղծող փաստաթուղթ։ Տրամադրվող տեղեկատվությունը կօգտագործվի բացառապես ներքին վերլուծության, պահանջների հստակեցման և ծրագրի նախապատրաստման նպատակներով և չի կարող ազդել ապագայում հնարավոր մրցութային գործընթացներին մասնակցելու իրավունքների վրա։ Քննարկումը կկայանա հունվարի 30-ին, ժամը 17:00-ից մինչև 19:00-ը (GMT+4)։ Այն կանցկացվի խառը ձևաչափով․ մասնակիցները կարող են մասնակցել ինչպես առկա Բարձր տեխնոլոգիական արդյունաբերության նախարարության գլխամասում (Երևան 0010, Վազգեն Սարգսյան 3/3), այնպես էլ առցանց ձևաչափով։ Քննարկմանը գրանցվելու և առցանց մուտքի հղումը ստանալու համար խնդրում ենք անցնել հետևյալ հղումով։ Խնդրում ենք նկատի ունենալ, որ ծառայություն մատուցող կազմակերպության յուրաքանչյուր ներկայացուցիչ պարտավոր է գրանցվել առանձին՝ քննարկմանը մասնակցելու համար: Եվ անձամբ, և առցանց մասնակցության դեպքում անհրաժեշտ է ներկայացնել անձը հաստատող փաստաթուղթ։ Հարցերի դեպքում կարող եք զանգահարել հետևյալ հեռախոսահամարով՝ 044 490626: Կանխավ շնորհակալություն ենք հայտնում Ձեր ժամանակի և համագործակցության համար։

ՀՀ կառավարության օգոստոսի 14-ի նիստում հաստատվել է բարձր տեխնոլոգիական արդյունաբերության նախարարության կողմից ներկայացված «Կիբեռանվտանգության մասին», «Հանրային տեղեկությունների մասին»,  «Տեղեկատվական համակարգերի կարգավորման մարմնի  մասին» օրենքների նախագծերի փաթեթը, որը մշակվել է Հայաստանի տեղեկատվական համակարգերի գործակալության հետ համատեղ: Ներկայացնելով նախագծերի փաթեթը՝ ԲՏԱ նախարար Մխիթար Հայրապետյանն ընդգծել է, որ այն նպատակ ունի ստեղծել միասնական և համակարգված մոտեցում կիբեռմիջադեպերի կանխարգելման, արձագանքման և հետևանքների վերացման համար՝ հիմնվելով պետություն-մասնավոր հատվածի սերտ համագործակցության վրա: Փաթեթով կարգավորվում են նաև միասնական թվայնացված միջավայրի ստեղծման և բաց տվյալների քաղաքականության ներդրմանն առնչվող հարցերը:  Նշվել է, որ փաթեթը անցել է երկարատև և բարդ քննարկումների փուլ, որոնցում ներգրավված են եղել քաղաքացիական հասարակության ներկայացուցիչներ, ոլորտային միություններ, անկախ փորձագետներ, միջազգային գործընկերներ և շահագրգիռ պետական գերատեսչություններ։ Նախարար Հայրապետյանը, անդրադառնալով նախագծերի փաթեթում ներկայացված օրենքներին, մանրամասնել է յուրաքանչյուրի կարգավորման առարկան, նպատակն ու կարևորությունը։«Կիբեռանվտանգության մասին» օրենքով սահմանվում են կենսական նշանակություն ունեցող ոլորտներն ու կրիտիկական ենթակառուցվածքները՝ ինչպես պետական, այնպես էլ մասնավոր հատվածում։ Սահմանվում են չափանիշներ՝ հիմնված ռիսկերի և ազդեցության գնահատման վրա, ինչպես նաև որոշակի ստանդարտներ, որոնք պարտադիր են պետական կառույցների, հանրային ոլորտի և քաղաքացիական ենթակառուցվածքներ շահագործող մասնավոր ընկերությունների համար»,- նշել է նախարարն՝ ընդգծելով, որ դա չի նշանակում հրաժարվել ազգային ստանդարտների մշակման և ներդրման գաղափարից։ Իր ելույթում նախարարը ներկայացրել է, որ ստեղծվելու է Տեղեկատվական համակարգերի կարգավորման մարմին, որը գործելու է ինքնավար մարմնի կարգավիճակով, իսկ անդամներն ընտրվելու են ՀՀ ազգային ժողովի կողմից։ Անդրադառնալով «Հանրային տեղեկությունների մասին» օրենքին՝ նախարարը նշել է, որ դրանով ուրվագծվում է պետական թվային ճարտարապետությունը և ներդրվում է տվյալների կառավարման նոր քաղաքականություն: Նախագծերի վերաբերյալ լրացուցիչ պարզաբանումներ է ներկայացրել նաև Հայաստանի տեղեկատվական համակարգերի գործակալության տնօրեն Ներսես Երիցյանը։ Ամփոփելով իր ելույթը՝  Մխիթար Հայրապետյանը կարևորել է հասարակության կիբեռգրագիտության բարձրացմանն ուղղված ծրագրերի իրականացումը։  Ավելին՝ տեսանյութում 

Հայաստանի տեղեկատվական համակարգերի գործակալությունը մեկնարկում է առաջին Ուսանողական ազգային կիբեռվարժանքը։ Այս հոկտեմբերին Հայաստանի տարբեր համալսարանների ուսանողներ կմասնակցեն ազգային մասշտաբով կիբեռանվտանգության սիմուլյացիոն վարժանքի, որտեղ կլուծեն իրական կիբեռ միջադեպեր։ Նախաձեռնությունը նպատակ ունի բարձրացնել կիբեռանվտանգության իրազեկվածությունն ու հմտությունները ուսանողների շրջանում։ Վարժանքը հանդիսանում է ՀՏՀԳ երկարաժամկետ ռազմավարության մի մասը՝ ուղղված թվային անվտանգ ապագայի կառուցմանը և կիբեռ առաջնորդների նոր սերնդի ձևավորմանը։ Մասնակիցները ներգրավված են իրական աշխարհում տեղի ունեցող կիբեռպատահարների մոդելավորմամբ՝ ինտերակտիվ, դերային ուսուցման մեթոդներով, համահունչ Հայաստանի թվայնացման և ազգային կիբեռանվտանգության օրակարգին։

2024թ․ մայիսին Երիտասարդ մասնագետների ներգրավման ծրագրի շրջանակում Գործակալությանը միացան 20 երիտասարդ մասնագետներ։ Մեկ տարվա ընթացքում երիտասարդ մասնագետներն ակտիվորեն ներգրավվեցին Գործակալության նորարարական նախաձեռնություններում՝ կիբեռանվտանգությունից մինչև Քաղաքացիների լաբորատորիա, տվյալների կառավարումից մինչև թվային ծառայությունների ստեղծում։ Ներսես Երիցյանն ամփոփիչ միջոցառմանը նշեց,  որ ծրագրի շնորհիվ երիտասարդ մասնագետները ոչ միայն ձևավորեցին կարևոր մասնագիտական փորձառություն, այլև հանդես եկան վերլուծություններով, նորարարական այլընտրանքային առաջարկներով ու լուծումներով՝ նպաստելով թվային փոխակերպման գործընթացին։ Նրանցից յուրաքանչյուրը դարձավ փոփոխությունների շարժիչ ուժ՝ ապացուցելով, որ հենց երիտասարդներն են Հայաստանի թվային հասարակության ապագան կերտողը։ Երիտասարդ մասնագետներից մի քանիսը կշարունակեն իրենց աշխատանքային ուղին հենց Գործակալությունում՝ շարունակելով ներդնել իրենց նորարար գաղափարներն ու էներգիան թվային Հայաստանի կերտման ճանապարհին։ Գործակալությունն իր երախտագիտությունն է հայտնում բոլոր մասնակիցներին՝ ստեղծարարության և թիմային աշխատանքի համար՝ մաղթելով նրանց հաջողություններ հետագա գործունեության մեջ։ 

Հայաստանի Հանրապետության քաղաքացիները 2025 թվականին կազատվեն էլեկտրոնային ստորագրության ակտիվացման տարեկան 3000 ՀՀ դրամ վճարից՝ սկսած սույն թվականի փետրվարի 1-ից:Այս նախաձեռնության նպատակն է հեշտացնել և խթանել քաղաքացիների համար էլեկտրոնային ստորագրության ձեռքբերումը և օգտագործումը՝ պետական և մասնավոր թվային ծառայություններից օգտվելիս, այդ թվում՝ ֆիզիկական անձանց տարեկան եկամուտները հայտարարագրելիս։

Հայաստանի տեղեկատվական համակարգերի գործակալությունը աջակցում է Հայաստանի թվային հասարակության ստեղծմանը։ ՀՀ կառավարության և  Կենտրոնական բանկի հետ համագործակցությամբ՝ մեր առաքելությունն է սահմանել հիմնական չափորոշիչներ հանրային ծառայությունների և թվային նախագծերի մատուցման համար: Մեզ առաջնորդող չափանիշը «Հայաստանի թվային ճարտարապետությունն» է՝ կառավարության կողմից հաստատված մոտեցումը, որի հիմնական հենասյուներն են փոխգործելիությունը, անվտանգությունը և բարձրորակ ծառայությունների մատուցումը: Մեր թիմը բաղկացած է տարբեր ոլորտների տեխնոլոգիաներ և քաղաքականություն մշակող մասնագետներից, և մեր նպատակն է աշխատել բաց և թափանցիկ միջավայրում՝ պետական և մասնավոր հատվածի համագործակցությամբ ստեղծելու իրապես թվային հասարակություն։ Այս համատեքստում Հայաստանի տեղեկատվական համակարգերի գործակալության և ՀՀ բարձր տեխնոլոգիական արդյունաբերության նախարարության կողմից համատեղ մշակվել են ծառայությունների թվայնացման սկզբունքներ՝ ուղղված օգտատերերի փորձառության բարելավմանն ու որակյալ ծառայությունների մատուցմաը։ Թվայնացման սկզբունքները և կից ուղեցույցները կարող եք գտնել «Թվայնացման ուղեցույցի» պաշտոնական կայքում։

«Հենակետ»-ը Հայաստանի պետական թվային ծառայությունների նախագծման պաշտոնական դիզայն-համակարգն է։ Դրա նպատակն է ապահովել նոր ստեղծվող թվային ծառայությունների դիզայնի միասնական մոտեցումները, մատչելիությունն ու օգտագործման պարզությունը։  Դիզայն-համակարգը ստեղծելու համար ուսումնասիրվել է ծառայությունների թվայնացման միջազգային լավագույն փորձը։ «Հենակետ»-ը մեծապես ստեղծվել է դանիական մոդելի մոտեցումներով (Դանիան ներկայումս առաջին տեղն է զբաղեցնում ՄԱԿ-ի թվային կառավարման վարկանիշներով): Դիզայն-համակարգին կից ստեղծվել է նաև ձևանմուշների գրադարան, որում ներկայացված են տարբեր բաղադրիչներով կառուցված պատրաստի էջեր պետական կայքերում օգտագործելու համար։ Այն ներառում է նաև պարզ ուղեցույցներ «Հենակետ»-ի բաղադրիչները օգտագործելու վերաբերյալ։  Մենք հավատում ենք, որ «Հենակետ» դիզայն-համակարգն իրապես կնպաստի Հայաստանում մատուցվող հանրային ծառայությունների բարելավմանը և օգտատերերի գոհունակության բարձրացմանը։ Ինչպես նաև ցանկանում ենք շնորհակալություն հայտնել Դանիայի թվայնացման գործակալության մեր գործընկերներին՝ աջակցության և խորհրդատվության համար: