Տեղեկատվական համակարգերի կարգավորման հանձնաժողովի նախագահ Ներսես Երիցյանը մասնակցել է World Trade Center Yerevan-ի նախաձեռնությամբ կազմակերպված Catalyst Talks միջոցառմանը, որտեղ ներկայացրել է Հայաստանի թվայնացման բարեփոխումների ընթացքը, հիմնական ուղղություններն ու տնտեսական ազդեցությունը։ Միջոցառման ընթացքում Ներսես Երիցյանը ներկայացրել է Հայաստանի թվայնացման բարեփոխումների տեսլականը՝ ընդգծելով, որ իրականացվող նախաձեռնությունները միտված են ավելի արդյունավետ պետական ծառայությունների, բարելավված բիզնես միջավայրի և ժամանակակից թվային տնտեսության ձևավորմանը: Քննարկման ընթացքում ներկայացվել են նաև արդեն իրականացվող և նախատեսվող թվային ծառայությունները, ինչպես նաև դրանց գործնական նշանակությունը քաղաքացիների և բիզնեսի համար։ Ներսես Երիցյանի խոսքով՝ թվայնացման բարեփոխումները կարող են նպաստել բիզնեսի վարչարարական բեռի նվազեցմանը, ծառայությունների արագացմանը և ավելի կանխատեսելի ու արդյունավետ գործարար միջավայրի ձևավորմանը։ Նա նաև կարևորել է մասնավոր հատվածի մասնակցությունը թվային լուծումների և նորարարական ծառայությունների զարգացման գործընթացում։ Միջոցառումն ավարտվել է հարցուպատասխանով, որի ընթացքում բիզնեսի ներկայացուցիչները քննարկել են թվայնացման բարեփոխումների գործնական ազդեցությունը բիզնես միջավայրի, պետական ծառայությունների և Հայաստանի թվային տնտեսության զարգացման վրա։ 

2026 թվականի հունիսի 3-ին Տեղեկատվական համակարգերի կարգավորման հանձնաժողովի նախագահ Ներսես Երիցյանը մասնակցեց «Կիբեռանվտանգությունը՝ ազգային առաջնահերթություն» խորագրով պանելային քննարկմանը, որը տեղի ունեցավ RISE ֆորումի շրջանակում։ Քննարկման ընթացքում պարոն Երիցյանն ընդգծեց, որ կիբեռանվտանգությունն այսօր այլևս միայն տեխնոլոգիական խնդիր չէ. այն ազգային դիմակայունության, տնտեսական անվտանգության և վստահելի թվային միջավայրի ձևավորման առանցքային նախապայմաններից է։ Անդրադառնալով ոլորտի հիմնական մարտահրավերներին՝ նա նշեց, որ աճող և արագ փոփոխվող կիբեռսպառնալիքների պայմաններում, երբ շուկայում նկատվում է որակյալ մասնագետների պակաս, իսկ ջանքերը հաճախ մնում են մասնատված, կիբեռանվտանգության ապահովումը հնարավոր է միայն պետության, մասնավոր հատվածի, ակադեմիական և մասնագիտական համայնքների սերտ համագործակցության, տեղեկատվության ժամանակին փոխանակման և համակարգված գործողությունների միջոցով։ «Կարևոր է գիտակցել, որ կիբեռանվտանգությունը նորարարության ճանապարհին խոչընդոտ չէ։ Ընդհակառակը՝ այն այն հիմքն է, որի վրա հնարավոր է կառուցել մասշտաբային, կայուն և դիմակայուն թվային զարգացում։ Ուժեղ կիբեռանվտանգությունը երկարաժամկետ հեռանկարում բարձրացնում է երկրի մրցունակությունը, ամրապնդում վստահությունը թվային ծառայությունների նկատմամբ և նպաստում առկա ներուժի լիարժեք իրացմանը», – նշել է պարոն Երիցյանը։ RISE ֆորումի շրջանակում կիբեռանվտանգության թեմայի քննարկումը ևս մեկ անգամ ընդգծեց անվտանգ և վստահելի թվային միջավայրի առանցքային նշանակությունը Հայաստանի տեխնոլոգիական զարգացման, թվային ծառայությունների ընդլայնման և տնտեսության մրցունակության բարձրացման համար։

«Բաց կառավարման շաբաթվա» շրջանակում անցկացված «Թվային ժողովրդավարություն և թափանցիկ կառավարում» թեմայով պանելային քննարկման ընթացքում Հայաստանի տեղեկատվական համակարգերի գործակալության տնօրեն Արթուր Սարգսյանը ներկայացրել է Հայաստանի թվային կառավարման նոր ճարտարապետության ձևավորման, տեղեկատվական համակարգերի կարգավորման և լիազոր մարմնի դերակատարության վերաբերյալ օրենսդրական կարգավորումները։  «Թվային ճարտարապետություն և Տեղեկատվական համակարգերի կարգավորման հանձնաժողով լիազոր մարմնի դերը» թեմայով ներկայացման ընթացքում անդրադարձ է կատարվել այն հարցին, թե ինչու է Հայաստանին անհրաժեշտ նոր թվային կառավարման ճարտարապետություն, ինչպես նաև «Հանրային տեղեկությունների մասին» և «Կիբեռանվտանգության մասին» ՀՀ օրենքների հիմնական նպատակներին ու դրանց նշանակությանը՝ պետական թվային համակարգերի զարգացման տեսանկյունից։  Քննարկման ընթացքում ընդգծվել է հանրային տեղեկատվության թվայնացման, բաց տվյալների, տեղեկատվության ճշգրտության և պետական համակարգերի փոխգործելիության կարևորությունը՝ որպես վստահելի, արդյունավետ, և մարդակենտրոն թվային ծառայությունների հիմք։  Անդրադարձ է կատարվել նաև քաղաքացիների թվային իրավունքների և անձնական տվյալների պաշտպանության հարցերին, ինչպես նաև կիբեռանվտանգությանը՝ որպես ոչ միայն տեխնիկական, այլև ժողովրդավարական և ազգային կայունության կարևոր բաղադրիչի։  «Հայաստանի թվային կառավարման նոր ճարտարապետությունը պետք է ապահովի ոչ միայն արդյունավետ պետական ծառայություններ, այլև վստահելի տվյալներ, պաշտպանված իրավունքներ և թափանցիկ կառավարման միջավայր», - նշել է Արթուր Սարգսյանը։  Ներկայացման ընթացքում խոսվել է նաև Տեղեկատվական համակարգերի կարգավորման հանձնաժողովի դերի մասին՝ համակարգման, միասնական ստանդարտների ձևավորման և պետական թվային միջավայրի զարգացման գործընթացներում։  Քննարկմանը մասնակցել են վարչապետի աշխատակազմի, քաղաքացիական հասարակության, միջազգային կազմակերպությունների և փորձագիտական համայնքի ներկայացուցիչներ։ 

Տեղեկատվական համակարգերի կարգավորման հանձնաժողովի նախագահ Ներսես Երիցյանը մասնակցել է «Կիբեռդիմակայունությունը ԱԲ դարաշրջանում․ պաշտպանելով պետությունները, ենթակառուցվածքներն ու վստահությունը» խորագրով պանելային քննարկմանը, որը կազմակերպվել էր «Երևանյան երկխոսություն 2026» միջազգային համաժողովի շրջանակներում։ Քննարկման ընթացքում անդրադարձ է կատարվել արհեստական բանականության դարաշրջանում կիբեռդիմակայունության, կարևոր ենթակառուցվածքների պաշտպանության և հանրային վստահության պահպանման մարտահրավերներին։ Ներսես Երիցյանն ընդգծել է, որ ժամանակակից կիբեռսպառնալիքները պահանջում են ոչ միայն տեխնոլոգիական լուծումներ, այլև միջազգային և պետություն-մասնավոր համագործակցության ամրապնդում։ 

Հայաստանի տեղեկատվական համակարգերի գործակալությունը (ՀՏՀԳ) ՀՀ կառավարության հանձնարարականով իրականացնում է «Կառավարության ՏՏ ծառայությունների փոխակերպման նախագիծը» (GITS)։   Նախագիծը նպատակ ունի պետական մարմիններում վերջնական օգտագործողի ՏՏ միջավայրը (աշխատակիցների համակարգիչներ/աշխատատեղեր և դրանց սպասարկումը) բերել միասնական, անվտանգ և կանխատեսելի մոդելի։ Ներկայումս պետական մարմինները հաճախ գնում են սարքավորումներ որպես առանձին ակտիվներ, այնուհետև ինքնուրույն կազմակերպում են տեղակայումն ու սպասարկումը, ինչի արդյունքում ձևավորվում են տարբերակված տեխնոլոգիական միջավայրեր, անհամաչափ սպասարկման որակ, հնացած սարքավորումներ և բարձր կիբեռանվտանգային ռիսկեր։   Նախագծի շրջանակներում նախատեսվում է անցում կատարել ծառայությունների վրա հիմնված մոտեցման՝ երբ աշխատատեղերը և հարակից ենթակառուցվածքները տրամադրվում են որպես ծառայություն՝ վարձակալության/լիզինգային տրամաբանությամբ՝ ներառելով սարքավորումների տրամադրում, տեղակայում, տեխնիկական աջակցություն, անվտանգ թարմացումներ, մոնիթորինգ, պարբերական փոխարինում (lifecycle management) և ծառայության ավարտի/ելքի (exit/transition) կարգավորված մեխանիզմներ։ Ծառայության որակը կառավարվելու է չափելի ցուցանիշներով՝ SLA/KPI, իսկ պայմանագրային մոդելը նախատեսում է հստակ պատասխանատվություն, վերահսկողություն և հաշվետվություն։   Նախագիծը կիրականացվի փուլային եղանակով։ 2026 թվականի ընթացքում նախատեսվում է հստակեցնել պիլոտային փուլի գնման մոտեցումը և շուկայի մասնակիցների հետ քննարկել ծառայությունների շրջանակը, իրատեսական պահանջները, մատուցման մոդելները և գնային կառուցվածքները՝ հետագա մրցութային գործընթացները ճիշտ կազմակերպելու համար։ Այդ նպատակով, Հայաստանի տեղեկատվական համակարգերի գործակալությունը հրավիրում է Ձեզ մասնակցելու «Կառավարության ՏՏ ծառայությունների փոխակերպման նախագծի» (GITS) նախնական քննարկումներին։ 

ՀՀ Ազգային Ժողովի Ութերորդ գումարման տասնմեկերորդ նստաշրջանի 2026 թվականի մարտի 26-ին գումարված հերթական նիստի ընթացքում Տեղեկատվական համակարգերի կարգավորման հանձնաժողովի նախագահ ընտրվեց Ներսես Երիցյանը։ Տեղեկատվական համակարգերի կարգավորման հանձնաժողովն ինքնավար կարգավորող մարմին է, որն ապահովում է տեղեկատվական համակարգերի անվտանգության միջոցառումների մշակման աշխատանքները և համակարգում տեղեկատվական համակարգերի անվտանգության միջոցառումների իրականացումը, մշակում է տեղեկատվական համակարգերի թվային ճարտարապետությունը: Հանձնաժողովի հիմնական խնդիրը Հայաստանի Հանրապետության միասնական, կիբեռանվտանգ թվային միջավայրի ձևավորման և զարգացման համար կարգավորող իրավական դաշտի ապահովումն է, որը հնարավորություն կտա պետական տեղեկատվական համակարգի միջոցով քաղաքացիներին մատուցել թվային հարմարավետ ծառայություններ։ Ելույթ ունենալով՝ Ներսես Երիցյանը շնորհակալություն է հայտնել Կառավարությանը վստահության և իր թեկնածությունն այդ կարևոր պաշտոնում առաջադրելու համար, ներկայացրել այդ պաշտոնում ընտրվելու պարագայում իր գործունեության տեսլականն ու պատկերացումները, խոսել թվային վերափոխման, մրցունակ թվային հասարակություն եւ տնտեսություն ձևավորելու գործընթացից, անդրադարձել կիբեռանվտանգության ապահովման հարցին, ոլորտում առկա մարտահրավերներին և այլ հարցերի: «Ձեր վստահությանն արժանանալուց հետո պատրաստ եմ իմ հանրային և կորպորատիվ կառավարման գիտելիքները, փորձը և լավագույն միջազգային փորձառությունը ներդնել, որպեսզի հանձնաժողովի անդամների հետ համատեղ ձևավորենք օրինակելի և մրցունակ  հանրային կառույց»,- ընդգծել է նա: Ներսես Երիցյանի կենսագրությանը կարող եք ծանոթանալ հետևյալ հղումով 

​​Հայաստանի​ ​տեղեկատվական​ ​համակարգերի​ ​գործակալությունը​ (​ՀՏՀԳ​) ​հրավիրում​ ​է​ ​հետաքրքրված շահագրգիռ կողմերին​​​ ​մասնակցելու​ նախամրցութային ​շուկայի​ ​ուսումնասիրության​ (market sounding) ​գործընթացին​, ​որն​ ​իրականացվում​ ​է​ ​նախատեսվող​ ​Կիբեռանվտանգության​ ​հետազոտության​ ​և​ ​զարգացման​ (R&D) ​դրամաշնորհային​ ​ծրագրի​ ​մեկնարկին​ ​ընդառաջ՝​ ​համաձայն​ ​կից​ ​ներկայացված Տեխնիկական​ ​առաջադրանքի։​  ​​Ծրագրի​ ​նպատակն​ ​է​ ​Հայաստանի​ ​Հանրապետությունը​ ​դիրքավորել​ ​որպես​ ​առաջադեմ​ ​կիբեռանվտանգության​ ​նորարարության​ ​տարածաշրջանային​ ​կենտրոն՝​ ​խթանելով​ ​կանխարգելիչ​, ​մասշտաբային​ ​և​ ​վավերացվող​ ​կիբեռպաշտպանական​ ​լուծումների​ ​զարգացումը​ ​պետական​ ​և​ ​կրիտիկական​ ​ենթակառուցվածքների​ ​ոլորտներում։ Նախամրցութային շուկայի ուսումնասիրության նպատակն է​ ​շուկայի​ ​մասնակիցներից ստանալ հետադարձ կարծիք՝​ ​ներառյալ​ ​մասնավոր​ ​հատվածի​ ​կազմակերպությունները​, ​հետազոտական​ ​հաստատությունները​ ​և​ ​միջազգային​ ​կազմակերպությունները​, ​որպեսզի​ ​հաստատվի​ ​առաջարկվող​ ​մոտեցման​ ​կենսունակությունը​, ​ապահովվի​ ​համապատասխանությունը​ ​միջազգային​ ​լավագույն​ ​փորձին​ ​և​ ​կատարելագործվի​ ​Տեխնիկական​ ​առաջադրանքը՝​ ​նախքան​ ​դրա​ ​պաշտոնական​ ​հրապարակումը։​ 

ՀՏՀԳ «Տվյալների կառավարման և փոխգործելիության» թիմի ղեկավար Լաուրա Այդինյանը «Doing Digital 2026» ֆորումի շրջանակներում մասնակցեց «Թվային ենթակառուցվածքներ և իրական տնտեսություն» խորագրով պանելային քննարկմանը։ Քննարկման առանցքում էր թվային հարթակների ու իրական տնտեսության կամրջման գործնական նշանակությունը։ Լաուրա Այդինյանն ընդգծեց՝ հիմնական գաղափարը կայանում է նրանում, որ հարթակները պետք է ծառայեն որպես հիմք, որի վրա բիզնեսները, ֆինանսական կազմակերպությունները և պետական գերատեսչությունները կմատուցեն բարձրորակ ծառայություններ ու կծավալեն անվտանգ գործունեություն։ Երբ այս հիմքերը ձևավորված են, իրական տնտեսությունն ինքնին սկսում է խթանել թվային առաջընթացը։ -Հայաստանում այս մոտեցումն այլևս ունի գործնական արտահայտություն։ Տվյալների փոխանակման նոր շերտի (ADEL) զարգացումը, դրա աջակցող բաղադրիչները՝ X-Road-ը, տվյալների կատալոգը և հիմնարար ռեգիստրերը, հնարավորություն են տալիս տարբեր կառույցների միջև ապահովել փոխգործելիություն։ Ավելի քան 30 կառույցներ՝ ինչպես պետական, այնպես էլ մասնավոր հատվածից արդեն իսկ միացել են համակարգին, որն իր ետևում է թողել «արդյոք փոխգործելիությունը հնարավո՞ր է» հարցը․ օրակարգային է դրա կիրառման մասշտաբայնացումը,- նշել է նա։«Doing Digital Forum»-ը ամենամյա միջոցառում է, որը միավորում է բիզնեսի, պետական գերատեսչությունների, ֆինանսական և տեխնոլոգիական ոլորտների առաջնորդներին: 2026 թվականին «Doing Digital Forum»-ը միավորվել էր «Հարթակների և տնտեսությունների կամրջում» խորագրի ներքո։